نیویارک:نیویارک سٹی کے میئر ایرک ایڈمز اور فیوچر آف ففتھ پارٹنرشپ نے ففتھ ایونیو کی تبدیلی کے منصوبے کا اعلان کیا ہے۔میئر ایرک ایڈمز کا کہنا ہے کہ اس اقدام کا مقصد نیو یارک شہر کے اس مشہور ایونیو کو مزید قابل رسائی، ماحول دوست، اور لوگوں کے لیے ایک بہتر تجربہ فراہم کرنا ہے۔ انہوں نے مزید کہا کہ ففتھ ایونیو ہمیشہ نیو یارک سٹی کا دل رہا ہے، لیکن اب ہم اسے مستقبل کے لیے مزید بہتر بنانے جا رہے ہیں۔ اس منصوبے میں سڑکوں کی دوبارہ ترتیب، پیدل چلنے والوں کے لیے زیادہ جگہ، نئی سائیکل لینز، اور عوامی مقامات کو بہتر بنانا شامل ہے، تاکہ ایونیو کو ایک محفوظ اور خوشگوار تجربے کے طور پر تشکیل دیا جا سکے۔اس منصوبے کی بدولت فٹ پاتھوں کی چوڑائی 46 فیصد تک بڑھائی جائے گی، اور ٹریفک کی پانچ لائنوں کو کم کر کے تین کر دیا جائے گا۔ یہ تبدیلی شہر کی ماحولیاتی بہتری اور کاربن کے اخراج میں کمی کے اہداف کو پورا کرنے میں بھی مددگار ثابت ہوگی۔فیوچر آف ففتھ پارٹنرشپ نے کہا، یہ شراکت داری نیو یارک کو دنیا کے سب سے زیادہ پیدل دوست اور ماحولیاتی لحاظ سے پائیدار شہروں میں تبدیل کرنے کے لیے اہم ہے۔ امید کی جاتی ہے کہ یہ منصوبہ اپنے نفاذ کے بعد پانچ سال سے بھی کم عرصے میں اپنی لاگت کو پورا کرے گا۔

This post was originally published on VOSA.