واشنگٹن(ویب ڈیسک) امریکی صدر ڈونلڈ ٹرمپ کی پالیسی پر عمل درآمد کرتے ہوئے امریکا میں غیر قانونی امیگرینٹس کے خلاف کریک ڈاؤن آپریشن شروع کرتے ہی 500 امیگرینٹس کو ملک بدر کر دیا گیا ہے۔

حالیہ رپورٹس کے مطابق امریکہ کی امیگریشن اینڈ کسٹمز انفورسمنٹ ایجنسی نے ملک بھر میں چھاپے مارتے ہوئے سینکڑوں امیگرینٹس کو گرفتار کر لیا ہے۔ وائٹ ہاؤس کی پریس سیکرٹری کیرولین لیویٹ نے بتایا کہ تاریخ کے سب سے بڑی کریک ڈاؤن میں 538 غیر قانونی امیگرینٹس کو گرفتار کیا گیا ہے۔ کیرولین لیویٹ نے مزید بتایا کہ گرفتار ہونے والوں میں ایک دہشت گرد، ٹرین ڈی آراگوا گینگ کے 4 کارندے اور نابالغوں کے خلاف جنسی جرائم کے مرتکب متعدد امیگرینٹس بھی شامل ہیں۔ وائٹ ہاؤس کی پریس سیکرٹری کا کہنا تھا کہ بعد ازاں ان غیر قانونی امیگرینٹس کو امریکی فوج کے سیکڑوں ہوائی جہازوں میں بھر کر ملک بدر کردیا گیا ہے۔ ڈونلڈ ٹرمپ نے 20 جنوری کو اپنے عہدے کا حلف اُٹھاتے ہی اپنی سخت اور متنازع امیگریشن پالیسی کے نفاذ کے لیے ایگزیکیٹو حکم نامہ جاری کیا تھا۔ جس کے بعد 23 جنوری کو امریکی کانگریس نے غیر قانونی طور پر امریکا میں رہنے والے امیگرینٹس کی حراست اور ملک بدر کرنے کا بل منظور کیا تھا۔

This post was originally published on VOSA.