سعودی عرب میں معرکہ حق بنیان مرصوص کی کامیابی کے حوالے سے یوم تشکر کی تقریب منعقد کی گئی جس میں سفارتی افسران سمیت کشمیری اور پاکستانی کمیونٹی کے اراکین کی بڑی تعداد موجود تھی۔دارالحکومت ریاض کے سفارت خانہ پاکستان میں منعقدہ تقریب میں بنیان مرصوص کی شاندار اور تاریخی کامیابی پر پرچم کشائی کی تقریب منعقد کی گئی جس میں تینوں مسلح افواج کے افسران نے شرکت کی جبکہ پاکستان کے سفیر  احمد فاروق نے  پرچم کشائی کی تو شرکائ نے پاکستان زندہ باد کے نعرے لگائے  ،

اس موقع پر احمد فاروق کا کہنا تھا کہ بھارت نے پاکستان پر جنگ مسلط کرکے خطے میں اپنی طاقت کے ذریعے اجارہ داری قائم کرنے کی کوشش کی جس کو پاکستانی قیادت،افواج پاکستان اور قوم نے یکجان ہوکر ناکام بنا ڈالا اور پیغام دیا کہ پاکستانی قوم ہر مشکل گھڑی میں نا صرف متحد ہے بلکے دشمن کو منہ توڑ جواب دینا بھی جانتی ہے۔

یوم تشکر کی تقریب سے دیگر مقررین نے خطاب کرتے ہوئے کہا کہ وہ پاکستان کی سیاسی اور عسکری قیادت کو خراج تحسین پیش کرتے ہیں جنھوں نے دلیرانہ اور پیشہ ورانہ فیصلوں کے ذریعے قوم کوسرخرو کیا اور ہم شہداء کو خراج عقیدت پیش کرتے ہیں جنھوں نے اپنی جانوں کا نذرانہ دیکر وطن عزیز کی حفاظت کو یقینی بنایا ۔تقریب میں مقامی گلوکاروں نے قومی نغمے  پڑھ کر شرکاء کے جوش کو خوب گرمایا جبکہ ہال پاکستان زندہ باد اور افواج پاکستان کے نعروں سے گونجتا رہا۔

This post was originally published on VOSA.