نیویارک(ویب ڈیسک) نیویارک سٹی کے میئر ایرک ایڈمز نے ففتھ ایونیو کو پیدل چلنے والوں کے لیے عالمی معیار کی شاہراہ میں تبدیل کرنے کے منصوبے کے لیے 402 ملین ڈالر کی سرمایہ کاری مختص کردی ہے۔

میئر ایرک ایڈمز کے مطابق، یہ منصوبہ برائنٹ پارک اور سینٹرل پارک کے درمیان واقع ففتھ ایونیو کو عالمی معیار کا پیدل راستہ بنائے گا اور نیویارک کی معیشت اور روزگار کے مواقع کو بھی بڑھائے گا۔ میئر ایڈمز نے دسمبر 2024 میں ابتدائی 152.7 ملین ڈالر کی سرمایہ کاری کے بعد مزید 250 ملین ڈالر کے اضافی فنڈز کا اعلان کیا ہے۔ اس منصوبے کے تحت سڑک کے دونوں اطراف کے فٹ پاتھ کو 46 فیصد بڑھایا جائے گا، پیدل چلنے والوں کے عبوری راستے کم کیے جائیں گے اور ٹریفک کے پانچ لینوں کو تین پر محدود کیا جائے گا۔ ساتھ ہی نئی شجرکاری، روشنی، اور بیٹھنے کی جگہیں فراہم کی جائیں گی تاکہ سڑک کو محفوظ، سبز، اور پیدل چلنے کے لیے موزوں بنایا جا سکے۔ زیر زمین پانی اور سیوریج لائنوں کی بھی اپ گریڈنگ کی جائے گی تاکہ کام جلد اور مؤثر طریقے سے مکمل ہو سکے۔ ففتھ ایونیو نیویارک کی معیشت کا اہم حصہ ہے جہاں 3 لاکھ سے زائد روزگار کے مواقع موجود ہیں اور سالانہ 44 ارب ڈالر اجرتیں اور 111 ارب ڈالر کا کل اقتصادی پیداوار ہوتا ہے۔ اس منصوبے کے بعد اس علاقے میں سرمایہ کاری اور کاروباری سرگرمیوں میں مزید اضافہ متوقع ہے۔ شہر کے مختلف حکومتی اور نجی ادارے، جن میں ففتھ ایونیو ایسوسی ایشن، گرینڈ سینٹرل پارٹنرشپ، سینٹرل پارک کنزرویسی، اور برائنٹ پارک کارپوریشن شامل ہیں، اس منصوبے میں تعاون کر رہے ہیں۔ ڈیزائننگ کا عمل 2025 کی گرمیوں تک مکمل ہونے کا امکان ہے۔ نیویارک محکمہ ٹرانسپورٹیشن کے کمشنر یڈانِس رودریگیز نے اس منصوبے کو شہر کے لیے اہم سرمایہ کاری قرار دیا ہے جو ففتھ ایونیو کو زیادہ قابل رسائی، سبز اور محفوظ بنائے گا۔ دیگر حکومتی اور نجی رہنماؤں نے بھی اس منصوبے کی حمایت کی اور اسے شہر کی ترقی میں تاریخی قدم قرار دیا ہے۔

This post was originally published on VOSA.