امریکی محکمہ انصاف نے اعلان کیا ہے کہ انسانی اسمگلنگ اور ٹریفکنگ نیٹ ورکس کے خلاف کارروائیوں میں تیزی لائی گئی ہے اور ان نیٹ ورکس کو توڑنے کے لیے مشترکہ ٹاسک فورس الفا (JTFA) کو مزید اختیارات اور وسائل فراہم کیے گئے ہیں۔

 اب اس فورس کی کارروائیاں شمالی سرحدوں اور سمندری علاقوں تک پھیلائی جا رہی ہیں تاکہ بین الاقوامی جرائم پیشہ تنظیموں کو نشانہ بنایا جا سکے۔اٹارنی جنرل پاملا بونڈی نے کہا کہ محکمہ انصاف انسانی اسمگلنگ کے کیسز پہلے سے زیادہ جارحانہ انداز میں نمٹا رہا ہے اور اس جرم سے منافع کمانے والوں کو سخت اور مکمل انصاف کا سامنا کرنا پڑے گا۔ تازہ کارروائیوں میں امریکہ اور میکسیکو کے درمیان بچوں کی اسمگلنگ میں ملوث افراد، شمالی سرحد سے اسمگلنگ کرنے والے اور بڑے پیمانے پر ہلاکتوں والے کیسز میں گرفتاریاں اور فردِ جرم شامل ہیں۔محکمہ انصاف نے مزید بتایا کہ فورس کو ایف بی آئی، ڈرگ انفورسمنٹ ایجنسی (DEA) اور اے ٹی ایف جیسے اداروں کے ساتھ بھی شراکت داری میں شامل کیا جا رہا ہے۔ یہ فورس اب بچوں کے استحصال، جنسی زیادتی، جبری مشقت اور کارٹیلز سے تعلق رکھنے والے کیسز میں مرکزی کردار ادا کرے گی۔سال 2025 میں اس فورس کی بڑی کامیابی ایک میکسیکن کارٹیل کے رکن کے خلاف دہشت گردی کی معاونت کے الزامات عائد کرنا ہے، جبکہ ٹیکساس میں انسانی اسمگلنگ کے ایک کیس میں مجرموں کو عمر قید اور 83 سال قید کی سزائیں سنائی گئیں۔ اب تک 410 سے زائد گرفتاریاں، 355 امریکی سزائیں اور 305 بڑی قید کی سزاؤں کے ساتھ اربوں ڈالر کے اثاثے ضبط کیے جا چکے ہیں۔

This post was originally published on VOSA.