امریکانےدعوی کیا ہےکہ اس نے ایران سے آنے والے جدید روایتی ہتھیاروں اور مہلک امداد کی ایک کھیپ ضبط کر لی ہے۔مشرق وسطیٰ میں امریکی سینٹرل کمانڈ نےایکس پر جاری بیان میں کہا کہ یہ کھیپ بحیرہ عرب میں ضبط کی گئی جسے یمن میں حوثیوں کے زیر کنٹرول علاقوں کی طرف لے جایا جا رہا تھا۔سینٹ کام نے اسلحہ کی تصاویر پوسٹ کرتے ہوئے لکھا ہے کہ اس کھیپ میں درمیانے فاصلے تک مار کرنے والے بیلسٹک میزائلوں کے اجزا، دھماکہ خیز مواد، بغیر پائلٹ سمندری ڈرون کے اجزا، مواصلاتی آلات اور فوجی نیٹ ورکس، اینٹی ٹینک گائیڈڈ میزائل لانچر کٹس اور دیگر فوجی اجزا شامل تھے۔ امریکی سینٹرل کمانڈ کے کمانڈر مائیکل ایرک کوریلا کے حوالے سے کہا گیا کہ یہ خطے میں ایران کی بدنیتی پر مبنی سرگرمیوں کی ایک اور مثال ہے۔انہوں نے مزید کہا کہ ہم اپنے اتحادیوں اور شراکت داروں کے ساتھ مل کر خطے میں امریکی اور اقوام متحدہ کی پابندیوں سمیت تمام جائز طریقوں سے اور مداخلتی کارروائیوں کے ذریعے ہلاکت خیز ایرانی امداد کے بہاؤ کا مقابلہ کرنے کے لیے پرعزم ہیں۔ انہوں نے نشاندہی کی کہ ایران کی طرف سے حوثیوں کو جدید روایتی ہتھیاروں کی مسلسل فراہمی بین الاقوامی قانون کی براہ راست خلاف ورزی ہے۔علاوہ ازیں امریکی محکمہ قانون کے بیان کے جواب میں ایرانی صدر ابراہیم رئیسی کے قانونی مشیر محمد دھقان کا کہنا ہے کہ اگر ایران کے بحری جہاز روکے گئے تو ردعمل دیں گے۔رواں ماہ امریکی وزارت قانون کے بیان میں کہا گیا تھا کہ پاسداران انقلاب کے معاشی نیٹ ورک کو توڑنے کے لیے 5 لاکھ بیرل سے زیادہ تیل کو قبضے میں لینے کا اعلان کیا گیا ہے۔ایرانی صدر کے قانونی مشیر محمد دھقان کا مذکورہ بیان پر رد عمل دیتے ہوئے کہنا تھا کہ ایرانی جہاز کو اگر تحویل میں لیا گیا تو ہم اپنا ردعمل ظاہر کریں گے اور اس حوالے سے قانونی راستہ کھلا ہوا ہے۔محمد دھقان نے کہا کہ وہ فی الحال یہ تصدیق نہیں کر سکتے کہ امریکی حکام کی جانب سے ایرانی بحری جہاز کو قبضے میں لیا گیا ہے یا نہیں۔بحیرہ احمر میں گذشتہ برس سے عالمی نقل و حرکت تعطل کا شکار ہے کیوں کہ یمن کے حوثی جنگجو اسرائیل کے ساتھ جاری تنازع کے دوران حماس کی حمایت میں بحری جہازوں کو نشانہ بنانے میں مصروف ہیں۔
This post was originally published on VOSA.
